नागपूरात भडकाऊसह आक्षेपार्ह व्हिडिओतून केंद्रीय मंत्री गडकरींना धमकी, आरोपीला अटक

नागपूर : सोशल मीडियावरून भडकाऊ आणि आक्षेपार्ह मजकूर प्रसारित करत केंद्रीय मंत्री नितीन गडकरी यांना जीवे मारण्याची धमकी दिल्याचा गंभीर प्रकार नागपूरात उघडकीस आला आहे. या प्रकरणी धंतोली पोलिस ठाण्यात गुन्हा दाखल करण्यात आला असून पोलिसांनी आरोपीला तात्काळ अटक केली आहे.

मिळालेल्या माहितीनुसार, एका फेसबुक आयडीवरून अपलोड करण्यात आलेल्या व्हिडिओमध्ये आरोपीने नितीन गडकरी आणि त्यांच्या कुटुंबीयांविरोधात अपमानास्पद व भडकाऊ वक्तव्ये केली. तसेच दुसऱ्या व्हिडिओद्वारे दोन समाजांमध्ये वैर निर्माण करून सांप्रदायिक तणाव पसरवण्याचा प्रयत्न केल्याचा आरोप आहे. या कृत्यामुळे शहरातील कायदा व सुव्यवस्थेला धोका निर्माण होण्याची शक्यता व्यक्त केली जात आहे.

या प्रकरणी अखिल भारत हिंदू महासभेचे राष्ट्रीय अध्यक्ष सुमित कुमार चौहान यांनी धंतोली पोलिस ठाण्यात तक्रार दाखल केली. त्यांनी ४ एप्रिल रोजी नागपूरात असताना फेसबुक व इंस्टाग्रामवर हे व्हिडिओ पाहिले आणि तात्काळ पोलिसांकडे धाव घेतली.

तक्रार मिळताच पोलिसांनी वेगाने तपास सुरू करून आरोपी आयुष अग्रवाल याची ओळख पटवली आणि त्याला अटक केली. आयुष हा हुडकेश्वर परिसरातील महालक्ष्मी नगर येथील रहिवासी असल्याचे समोर आले आहे.

या प्रकरणात आरोपीविरोधात आपराधिक धमकी, समाजात तेढ निर्माण करणे, अपमानास्पद वक्तव्ये करणे, अफवा पसरवून शांतता भंग करणे आणि मानहानी यांसारख्या गंभीर कलमांखाली गुन्हा दाखल करण्यात आला असून पुढील तपास सुरू आहे.

GET YOUR OWN WEBSITE

FOR ₹9,999

Domain & Hosting FREE for 1 Year

No Hidden Charges